Su giocu de sa murra

SA MURRA

Su giocu de sa murra

Bene bènnios in su giassu de su giocu de sa murra!

In custu giassu – su primu nàschiu in su web a pitu de custu giocu – si poden acatae informatziones a inghìriu de sa murra, de su campionau sardu, de s’Atòbiu de sos murradores de su Mediterraneu e medas àteras novas.

murra: giocu anticu e populare, giai connotu dae Egitzianos, Grecos e Romanos – custos ùrtimos ddu muntian micàtio, est galu giocau dae diferentes pòpulos e mascamente dae su pòpulu sardu.

Sa murra est unu giocu meda teatrale e, mascamente sa murra sarda, musicale, chin unu ritmu precisu e sichiu.

Comente si giocat:
Duos giocadores bocan a campu unos cantos pòddiches e, in su matessi tempus, depen abochinare unu nùmeru dae duos a deche (murra). Binchet su puntu chine incertat su totale de sos pòddiches bocaos dae ambos duos sos giocadores, tando sichit a giocare contras a s’àteru isfidante.

Po giocare bene a sa murra, tocat a istare abistos, chircando de cumprende sos nùmeros chi at a bocare a campu s’isfidante. Duncas tocat a giocae meda po allestriae sos riflessos.

Po àteras informatziones: Wikipedia »     murra